Me hyrjen në fuqi të ligjit të ri për mbrojtjen e shëndetit nga produktet e duhanit kanë nisur kontrollet në subjektet si bare dhe restorante nga inspektorët e shëndetësisë.
Këta inspektorë do vijojnë çdo ditë me monitorimet në terren për mbrojtjen e shëndetit nga duhani si dhe evidentimin e shkeljeve për të cilat nuk ka tolerime.
“Nuk është një aksion sporadik, inspektorët e shëndetësisë do të jenë çdo ditë në terren për të monitoruar zbatimin e ligjit për mbrojtjen e shëndetit nga duhani, përfshirë edhe cigaret elektronike, shisha/nargjile dhe çdo lloj produkti duhani”, tha ministrja e Shëndetësisë dhe Mbrojtjes Sociale Ogerta Manastirliu mbi këto aksione.
“Nëse nuk respekton ligjin, nuk falesh! 6-fishim gjobe dhe pezullim aktiviteti për subjektet që shkelin ligjin në mënyrë të përsëritur”, tha Manastirliu.
Ligji anti-duhan nisi të zbatohej në vitin 2014 ku restorante bare dhe lokale ndaluan konsumimin në ambiente të brendshme.
Sipas statistikave 25 % e vdekjeve të parakohshme tek meshkujt kanë shkak duhanpirjen dhe 9.1% e vdekjeve para kohe tek femrat kanë shkak duhanin.
