Kreu i Aleancës për Ardhmërinë e Kosovës, Ramush Haradinaj ka konfirmuar se pas certifikimit të rezultateve të zgjedhjeve, ai do ta dorëzojë mandatin e deputetin në Kuvend.
Në një postim në Facebook, Haradinaj ka falënderuar të gjithë votuesit dhe mbështetësit.
“Ua kam borxh rikthimin e fuqishëm të një Aleance të pjekur, të strukturuar mirë, me kuadro të reja, gjithsesi me rrënjë të forta thellë në tokën e Kosovës”, është shprehur Haradinaj duke shtuar se do të vijojë të reformojë Aleancën për Ardhmërinë e Kosovës, për ta rikthyer atë më të fuqishme.
Sipas rezultateve, Aleanca për Ardhmërinë e Kosovës bashkë me PSD’në, kanë dalë të katërtit në zgjedhjet parlamentare të 6 tetorit, duke fituar 11.57 % të votave.
Në shkurt të vitit 2016, kreu i Aleancës kishte dorëzuar mandatin e tij të deputetit, pas pakënaqësive që atë kohë kishte me punën e këtij institucioni.
Haradinaj gjithashtu është shprehur se “do t’u qëndroj në krahë edhe kundërshtarëve politik, nëse ata do të vazhdojnë drejtimin që nisëm ne, për mbrojtjen dhe forcimin e interesit strategjik dhe sovranitetit të Kosovës”.
Postimi i plotë i Haradinaj:
Tani që po përmbyllet ky cikël zgjedhor, dua që të shprehë mirënjohjen time të thellë për secilën nga mbi 100,000 votat e besuara nga Ju, për mua si kandidat për Kryeministër.
Përjetësisht falënderues!
Do të vazhdoj të mbetem besnik ndaj vullnetit tuaj politik, besimit që ma keni dhënë dhe përkrahjes së vazhdueshme e të pakursyer për tash e 20 vite, përgjatë të gjitha proceseve që ka kaluar vendi.
Fati im personal e politik, asnjëherë nuk ka qenë më i mirë se fati i Kosovës. Në secilin rast, do të vazhdoj punën e pandalshme në mbrojtje të interesave të Kosovës dhe qytetarëve të saj dhe do t’u qëndroj në krahë edhe kundërshtarëve politik, nëse ata do të vazhdojnë drejtimin që nisëm ne, për mbrojtjen dhe forcimin e interesit strategjik dhe sovranitetit të Kosovës.
Uroj që sa më parë të kemi konstituim të institucioneve, me të njejtën pjekuri politike siç e zhvilluam këtë proces zgjedhor.
Ulësen time në Kuvendin e Kosovës, do ta lë për kolegët, por pandalë, do të vazhdoj të mbaj të hapura dyertë e Aleancës për reformën e nevojshme që e kërkoi sovrani, dhe për mbajtjen e vëmendjes së plotë e të pakursyer tek temat jetike për vendin, pa asnjë kompromis.
Ua kam borxh rikthimin e fuqishëm të një Aleance të pjekur, të strukturuar mirë, me kuadro të reja, gjithsesi me rrënjë të forta thellë në tokën e Kosovës.
Përgjithmonë i juaji, sa herë kërkon vendi e populli.
Ramush Haradinaj