Pas një sezoni të dështuar në Spanjë me ekipin e Levantes, Armando Sadiku është kthyer në Shqipëri në një tjetër fushë, në atë të gatimit.
I ftuar në emision “Kush vjen për drekë” që transmetohet në TV Klan, sulmuesi i Kombëtares ka prekur edhe disa tema të ndjeshme për tifozët shqiptarë, duke komentuar punën që tekniku Panuçi është duke bërë më grupin e lojtarëve.
Sadiku është shprehur se kur rikthehet në Tiranë, njerëzit e ndalojnë shpeshherë në rrugë, duke i kërkuar në formën e lutjes përsëritjen e një tjetër suksesi, për të dërguar Shqipërinë sërish në Europian.
“Pritshmëritë janë të larta për Europianin e ardhshëm dhe kjo është normale. Faktikisht është e vërtetë që është ndërruar trajneri, pasi tashmë jemi nën udhëheqjen e Panuçit, por lojtarët janë po ata.
Tashmë do të mundohemi t’i bëjmë tifozët të lumtur ashtu siç i bëmë në Europian. Një e përbashkët mes De Biazit dhe Panuçit është pikërisht stili i tyre i ashpër në mënyrën e sjelljes me lojtarët. Megjithatë me De Biazin kemi kaluar vite, ndërsa me trajnerin e ri kemi vetëm disa muaj. Tashmë duhet t’i lëmë edhe pak kohë këtij të fundit. Ankesat kundrejt trajnerit? Në Shqipëri të gjithë e kanë ves të ankohen.
Unë kur kaloj në Tiranë dëgjoj njerëzit që më luten, duke më thënë se duan me patjetër një tjetër kualifikim në Europian, pasi kjo është e vetmja mënyrë që emri i Shqipërisë të njihet sa më tepër. Gjithmonë e ndiej përgjegjësinë e Kombëtares, pasi më rrënqethet mishi kur dëgjohet himni”, ka thënë Sadiku
