Interi ka bërë të ditur përmes llogarisë në Twitter se Luciano Spalleti nuk është më trajner i skuadrës zikaltër. Luciano Spalletti u emërua trajner i Interit më 9 qershor të vitit 2017 dhe kontrata e tij ishte e vlefshme deri më 30 qershor të vitit 2021.
Megjithatë, klubi zikaltër ka lajmëruar përmes Twitterit se Spalletti nuk do ta mbajë pozitën e trajnerit deri në fund të kontratës dhe rrugët e tyre tashmë janë ndarë. Gjatë 720 ditëve të kaluara si trajner i Interit, Spalleti i zhvilloi gjithsej 90 ndeshje, prej të cilave 46 i fitoi, 24 i barazoi dhe 20 i humbi.
Përkundër që ai e siguroi kualifikimin në Ligën e Kampionëve për të dytin sezon radhazi, mediat italiane kishin parashikuar se ai do të shkarkohet së shpejti dhe në vend të tij pritet të vijë Antonio Conte.
